<< ߡߐ߱ ߟߎ߬ ߞߟߌ ߒߞߏ߫ ߞߊߙߊ߲ ߡߊ߬ ߸ ߛߴߊ߬ ߟߎ߬ ߘߌ߫ ߞߍ߫ ߘߎߢߊ߫ ߞߊ߬ߟߊߡߊ߬ >>
ߒ ߞߴ ߌߟߋ ߟߋ߬ ߡߊ߬ ߒ ߞߊ߲ ߝߐߟߊ
ߌߟߋ ߡߍ߲ ߞߊ߲ ߕߍ߫ ߛߕߍ ߟߊ߫
ߊ߬ ߘߏ߲߬ ߛߓߍߣߍ߲ ߕߴߛߋ߫ ߝߐ߫ ߟߊ߫
ߡߐ߰ ߓߘߊ߫ ߣߊ߫ ߸ ߏ߬ ߦߴߊ߬ ߛߓߍ߫ ߟߊ߫
ߒ ߞߏ߫ ߌ ߘߐߖߊ߬ ߸ ߌ ߦߋ߫ ߞߎ߬ߛߊ߲߬ߧߊ
ߏ߬ ߞߊ߬ߙߊ߲ ߠߊ߫ ߸ ߣߴߊ߬ ߛߓߍ ߟߊ߫
ߛߴߌ ߘߌ߫ ߘߤߊ߫ ߦߊ߲߬ ߘߎߢߊ߫
ߊߟߊ߫ ߓߘߴߌ ߛߐ߬ ߤߙߊߓߊ ߟߊ߫
ߌ ߞߊ߫ ߢߌ߲߬ ߡߌ߬ߘߊ߬ ߘߋ߬ ߡߣߊ߬ߡߣߊ߬ ߘߌ߫
ߌ ߞߴߊ߬ ߖߌ߰ ߝߋߎ߫ ߗߋߒߕߊ߲ߧߊ ߘߌ߫
ߌ ߘߏ߲߬ ߞߵߊ߬ ߖߌ߰ ߞߏ߫ ߜߍߟߍ߲ ߘߌ߫
ߓߊߏ߬ ߸ ߊ߬ ߛߎ߬ߘߎ߲߬ߡߊ߲߫ ߸ ߌ ߟߐ߲ߞߏ ߟߊ߫
ߌ ߦߋ߫ ߛߓߍ ߟߋ߬ ߘߐߙߐ߲߫ ߞߊ߬ߙߊ߲߬ ߠߊ߫
ߌ ߕߍ߫ ߞߎߡߊ ߟߎ߬ ߞߘߐ ߞߊ߬ߙߊ߲߬ ߠߊ߫
ߏ߬ ߟߋ ߞߏߛߐ߲߬ ߸ ߌ ߕߍ߫ ߡߍ߲߫ ߠߊ߫
ߌ ߘߌ߫ ߞߎ߬ߛߊ߲߬ߧߊ߫ ߒߞߏ ߛߕߍ ߟߊ߫
ߞߊߙߏ߫ ߛߓߊ߬ ߞߍ ߒߞߏ ߞߊߙߊ߲ ߠߊ߫
ߌ ߘߌ߫ ߝߋ߲߫ ߟߐ߲߫ ߸ ߏ߬ ߛߊ߬ߓߊ ߘߐ߫
ߌ ߡߊ߫ ߡߍ߲ ߟߐ߲߫ ߛߊ߲߬ ߛߓߊ߬ ߘߐ߫
ߝߘߊ߬ߜߍ ߞߊ߲ ߞߊ߬ߙߊ߲߬ߕߊ ߟߊ߫
ߒߞߏ ߢߌ߲߬ ߠߋ߬ ߞߊ߲ ߣߐ߬ ߘߌ߫
ߞߊ߲ ߕߐ߭ ߟߎ߬ ߘߐ߫ ߛߘߊߡߊ ߘߌ߫
ߊ߬ߟߋ ߟߋ߬ ߦߋ߫ ߖߊ߬ߥߏ ߞߊ߲ ߘߌ߫
ߝߘߊ߬ߜߍ ߟߎ߬ ߓߍ߯ ߦߴߊ߬ ߝߐ߫ ߟߊ߫
ߕߎ ߞߘߐߟߊ ߖߊ߬ߥߏ ߞߎߡߊ ߟߋ߬
ߜߍߞߊ߲ߠߊ ߝߘߏ߬ߓߊ ߟߋ߬
ߝߘߊ߬ߝߌ߲߬ߠߊ ߓߍ߯ ߘߍ߭ ߟߋ߬
ߡߋ߬ߘߋ ߞߏߛߐ߲߬ ߸ ߏ߬ ߕߍ߫ ߛߓߍ߫ ߟߊ߫
ߞߏ ߡߍ߲ ߣߐ߬ ߊ߲ߠߎ߬ ߘߛߍ߫ ߟߊ߫
ߊ߲ ߠߊ߫ ߞߊ߲ ߠߎ߬ ߛߓߍ߫ ߟߊ߫
ߖߎ߬ߛߎ ߟߋ߬ ߕߍ߫ ߝߘߊ߬ߝߌ߲ ߠߎ߬ ߟߊ߫
ߖߎ߬ߛߎ ߟߋ߬ ߘߏ߲߬ ߞߏ ߟߎ߬ ߞߍ߫ ߟߊ߫
ߘߏ߬ ߟߎ߬ ߘߏ߲߬ ߘߊ߫ ߡߏߙߌ߫ ߞߊߙߊ߲ ߘߐ߫
ߊ߬ ߣߌ߫ ߕߎ߬ߓߊ߬ߓߎ ߞߊ߲ ߞߊ߬ߙߊ߲ ߘߐ߫
ߏ߬ ߛߌ߫ ߡߴߊ߲ ߓߐ߫ ߜߘߏߦߊ ߘߐ߫
ߝߊ߬ ߞߊ߲ ߠߋ߬ ߟߐ߲ߠߌ߲ ߖߘߌ߫ ߟߊ߫
ߌ ߓߴߌ ߘߐߖߊ߬ ߥߊߟߌ߫ ߞߏ ߘߐ߫
ߥߟߴߌ ߞߊ߬ߙߊ߲߬ ߘߊ߫ ߥߊߟߌ߫ ߞߊ߲ ߘߐ߫
ߌ ߘߏ߲߬ ߡߊ߫ ߞߊ߬ߙߊ߲߬ ߸ ߌ ߟߊ߫ ߞߊ߲ ߘߐ߫
ߌ ߓߘߊ߫ ߞߊ߬ߙߊ߲߬ ߛߊ߫ ߸ߕߐ߬ ߦߴߌ ߟߊ߫
ߏ߬ ߟߋ ߞߏߛߐ߲߬ ߋߟߋ ߬ߡߊ߬ߘߋ߲߬ߞߊ߬
ߋߟߋ߬ ߖߎ߬ߟߊ߬ߓߊ ߸ ߋߟߋ߬ ߛߋߥߎߞߊ߫
ߋߟߋ߬ ߘߊߝߌ߲ ߸ ߋߟߋ߬ ߞߊ߬ߛߏ߲߬ߞߊ
ߊߟߴߊߟߎ߫ ߘߐߖߊ߬ ߒߞߏ ߛߓߍ ߟߊ߫
ߌߟߋ߬ ߞߏ߬ߣߌ߲߬ߧߊ߸ ߌߟߋ ߓߎ߬ߣߌ߲߫
ߌߟߋ ߞߎ߬ߙߊ߲߬ߞߐ ߸ ߌߟߋ ߖߡߌߣߌ߲
ߊߟߎ߬ ߡߍ߲ ߓߍ߯ ߝߊ߬ ߞߊ߲ ߣߌ߲߬
ߓߍ߯ ߊ߬ ߓߊ߲ߓߊ߲߫ ߣߌ߲߬ ߛߓߍ߫ ߟߊ߫
ߌߟߋ ߞߐ߰ߦߊ߮߸ ߌߟߋ ߡߊ߬ߥߎ߬ߞߊ
ߌߟߋ ߞߏ߬ߙߏ߫ ߸ ߌߟߋ ߖߊ߬ߟߏ߲߬ߞߊ
ߣߴߊߟߎ߫ ߤߊ߲ߞߟߌ ߓߘߊ߫ ߟߊߞߊ߬
ߛߓߍߟߌ ߢߌ߲߬ ߛߍߥߊ ߞߵߊߟߎ߫ ߟߊ߫
ߊߟߎ߫ ߢߊ߯ߟߋ߲߫ ߣߌ߲߬ ߛߓߍ߫ ߟߊ߫
ߓߍ߯ ߊ߬ ߞߊ߬ߙߊ߲߬ߧߊ ߸ ߞߊ߬ ߛߴߊ߬ ߟߊ߫
ߞߊ߬ ߡߎ߮ ߕߋ߬ ߜߘߏߦߊ ߟߊ߫
ߟߐ߲ߠߌ߲ߓߊߟߌߦߊ ߦߋ߫ ߕߊ߯ ߥߎߟߊ߫ ߟߊ߫
ߌ ߕߴߌ ߡߙߌ߫ ߸ ߌ ߦߴߌ ߕߊ߬ߛߌ߫
ߊߙߊߓߎ ߟߎ߫ ߡߊ߬ ߸ ߊ߬ ߣߌ߫ ߝߊ߬ߙߊ߲߬ߛߌ ߟߎ߬
ߊ߬ߟߎ߬ ߟߊ߫ ߞߏ ߸ ߌ ߦߴߏ߬ ߞߙߐ߬ߛߌ߫
ߏ߬ ߓߍ߯ ߞߊ߬ߙߊ߲߬ ߠߊ߫ ߸ ߏ߬ ߓߍ߯ ߛߓߍ߫ ߟߊ߫
ߒ߬ߓߊ߬ ߸ ߞߊ߬ߥߊ߲߬ߘߌ ߊߙߊߓߎ ߟߎ߬ ߡߊ߬
ߌ ߦߵߌ ߖߞߊ߫ ߕߎ߬ߓߊ߬ߓߎ ߟߎ߬ ߡߊ߬
ߌ ߦߴߌ ߞߐߝߍߣߍ߲߫ ߸ ߌ ߟߊ߫ ߞߊ߲ ߡߊ߬
ߌ ߓߊ߯ ߡߍ߲ ߝߐ߫ ߸ ߌ ߦߋ߫ ߛߴߏ߬ ߛߓߍ߫ ߟߊ߫
ߛߓߍ ߘߌߡߊ߲߫ ߠߋ߬ ߦߏ߫ ߟߌ߫ ߖߌ߫
ߊߟߊ߫ ߘߏ߲߬ ߡߊ߫ ߛߓߍ ߟߊߖߌ߰
ߡߐ߮ ߟߎ߬ ߡߊ߬ ߸ ߦߏ߫ ߛߊ߲ߖߌ߫
ߓߍ߯ ߟߋ߬ ߣߐ߬ ߸ ߊ߬ ߕߊ߫ ߛߓߍ߫ ߟߊ߫
ߡߋ߬ߘߋ ߞߏߛߐ߲߬ ߸ ߌ ߝߣߊ߫ ߕߴߌ ߖߊ߬
ߌ ߞߊ߲ ߛߓߍ ߞߏ ߸ ߌ ߦߴߏ߬ ߘߐߖߊ߬
ߞߊ߬ ߟߐ߲ߠߌ߲ ߢߌߣߌ߲ ߘߐߖߊ߬
ߞߴߌ ߖߘߍ߬ ߓߐ߫ ߜߘߏߦߊ ߟߊ߫
ߊߟߊ߫ ߘߏ߲߬ ߞߊ߲߫ ߞߋߟߓߊ ߦߋ߫
ߞߏ߫ ߊ߬ ߦߴߊ߬ ߝߐ߫ ߸ ߛߊ߬ߓߊ ߟߎ߬ ߦߋ߫
ߏ߬ ߟߎ߬ ߦߴߊ߬ ߝߐ߫ ߛߌ߬ߟߊ߬ߡߊ ߟߎ߬ ߦߋ߫
ߞߏ߫ ߓߍ߯ ߛߍߥߊ߫ ߟߊ߫ ߸ ߊ߬ ߕߊ߫ ߞߏ߫ ߟߊ߫
ߌ ߝߣߊ߫ ߛߍߥߊ߫ ߌ ߟߊ߫ ߞߏ ߘߐ߫
ߌ ߦߋ߫ ߟߐ߲ߠߌ߲ ߸ ߌ ߟߊ߫ ߞߊ߲ ߘߐ߫
ߌ ߦߋ߫ ߘߌ߯ߣߊ ߢߊߟߐ߲߫ ߸ ߊ߬ ߘߐ߫
ߊߟߊ߫ ߝߣߊ߫ ߘߌ߫ ߛߍߥߊ߫ ߊߟߎ߫ ߟߊ߫
ߡߏߙߌߓߊ ߟߎ߬ ߓߍ߯ ߛߍߥߊ߫ ߟߊ߫
ߛߓߍ ߟߐ߲ߠߊ ߓߍ߯ ߢߊ߫ ߟߊ߫
ߒߞߏ ߛߓߍ ߣߌ߲߬ ߠߊߓߐ ߟߊ߫
ߟߐ߲ߠߌ߲ ߖߘߌ߫ ߟߋ߬ ߸ ߏ߬ ߟߎ߬ ߛߍߥߊ߫ ߟߊ߫
ߡߍ߲ ߠߎ߬ ߘߊ߲߬ߣߍ߲ ߝߘߊ߬ߜߍ ߡߊ߬
ߣߴߊ߬ߟߎ߬ ߡߊ߫ ߛߋ߫ ߛߥߊ߬ߓߊ ߡߊ߬
ߏ߬ ߟߎ߬ ߦߙߌ ߕߍ߫ ߒߞߏ ߛߓߍ ߡߊ߬
ߊ߬ ߖߍ߬ߘߍ ߝߊ߲߭ ߦߋ߫ ߸ ߏ߬ ߕߙߐ߫ ߟߊ߫
ߤߊߟߌ߬ ߸ ߏ߬ ߟߎ߬ ߞߊ߬ ߊߙߊߓߎ ߟߐ߲߫
ߥߟߊ߫ ߸ ߊ߬ߟߎ߫ ߞߊ߬ ߕߎ߬ߓߊ߬ߓߎ ߟߐ߲߫
ߏ߬ ߟߎ߬ ߕߍ߫ ߣߊ߬ ߒߞߏ ߛߓߍ ߟߐ߲߫
ߏ߬ ߟߎ߬ ߖߌ߬ߣߍ߲߫ ߒߞߏ ߛߓߍ ߟߊ߫
ߏ߬ ߖߏ ߦߴߊ߬ߟߎ߬ ߕߊ ߘߐ߫
ߖߟߎ߬ ߜߘߍ߫ ߕߍ߫ ߸ ߏ߬ ߟߎ߬ ߞߊ߲ ߘߐ߫
ߊ߬ߟߎ߬ ߢߊ ߦߋ߫ ߛߓߍߓߊ ߟߎ߬ ߘߐ߫
ߞߏߓߊ ߟߎ߬ ߘߐߛߊߙߌ߫ ߟߊ߫
ߌߟߋ ߡߍ߲ ߡߊ߬ ߝߋ߲ ߜߘߍ߫ ߟߐ߲߫
ߌ ߡߊ߫ ߕߎ߬ߓߊ߬ߓߎ ߟߊ߫ ߛߓߍ ߟߐ߲߫
ߌ ߡߴߊߙߊߓߎ ߕߊ ߝߣߊ߫ ߟߐ߲߫
ߌ ߝߊ߬ ߞߊ߲ ߣߌ߲߬ ߞߊߣߊ߬ ߕߏ߫ ߌ ߟߊ߫
ߊߟߊ߫ ߕߍߣߊ߬ ߡߐ߱ ߘߍ߬ߡߍ߲߬ ߠߊ߫
ߟߊߟߌ ߘߐ߫ ߸ ߌ ߟߊ߫ ߓߏ߲ ߠߊ߫
ߌ ߓߊ߯ ߞߎ߬ߙߎ ߞߍ߫ ߞߏ ߡߍ߲ ߠߊ߫
ߊߟߊ߫ ߦߋ߫ ߸ ߏ߬ ߟߋ ߟߊߕߍ߰ ߟߊ߫
ߡߐ߮ ߟߊ߫ ߞߏ ߕߍ߫ ߦߟߍ߬ߡߊ߲߫
ߝߏ߫ ߌ ߖߍ߬ߘߍ ߓߊ߯ ߸ ߊ߬ ߡߊߦߟߍ߬ߡߊ߲߫
ߊߟߊ߫ ߝߣߊ߫ ߘߌ߫ ߸ ߊ߬ ߟߊߦߟߍ߬ߡߊ߲߫
ߞߵߊ߬ ߟߊߧߊ߬ ߸ ߌ ߖߍ߬ߘߍ ߓߟߏ߫ ߟߊ߫
ߒ߬ߓߊ߬ ߸ ߌ ߘߐߖߊ߬ ߸ ߌ ߟߊ߫ ߞߊ߲ ߞߊ߲߬
ߌߴߊ߬ ߦߟߍ߬ߡߊ߲߫ ߊ߬ ߢߊ ߓߘߍ ߞߊ߲߬
ߌ ߦߴߌ ߓߊ߲ߓߊ߲߫ ߸ ߌ ߟߊ߫ ߞߏ ߟߎ߬ ߞߊ߲߬
ߞߵߊ߬ߟߎ߫ ߦߟߍ߬ߡߊ߲߫ ߘߙߎ߬ߞߕߐ ߟߊ߫
ߌ ߘߴߌ ߡߙߌ ߕߏ߫ ߣߊ߬ߕߊ ߟߎ߬ ߘߐ߫
ߞߴߌ ߕߐ߮ ߕߏ߫ ߞߏ ߜߊ߲ߛߊ߲߫ ߠߎ߬ ߘߐ߫
ߞߴߢߌ߲߬ ߞߊ߬ߙߊ߲ ߕߏ߫ ߸ ߟߐ߯ߟߊ ߘߐ߫
ߘߎߢߊ ߞߏ ߓߍ߯ ߕߍߣߊ߬ ߢߊߓߐ߫ ߟߊ߫
ߌ ߞߴߌ ߓߌ߬ߟߊ߬ ߘߋ߬ ߞߏߟߐ߲ߓߊߟߌ ߝߍ߬
ߌ ߞߴߌ ߓߌ߬ߟߊ߬ ߝߋߎ߫ ߸ ߡߙߌߓߊߟߌ ߝߍ߬
ߌ ߓߊ߯ ߢߌ߲߬ ߞߊ߬ߙߊ߲߬ ߸ ߏ߬ ߡߍ߲ ߘߊߝߍ߬
ߊ߬ ߘߴߊ߬ ߝߐ߫ ߞߏ߫ : ߢߌ߲߬ ߕߴߛߋ߫ ߢߊߦߋ߫ ߟߊ߫
ߊ߬ ߡߊ߫ ߞߊ߬ߙߊ߲߬ ߟߐ߲߫ ߝߘߊ߬ߜߍ ߘߐ߫
ߌ ߓߊ߯ ߝߐ߫ ߘߏ߲߬ ߒߞߏ ߞߊ߬ߙߊ߲ ߘߐ߫
ߊ߬ ߘߴߌ ߖߋ߬ߓߌ ߞߍ߫ ، ߌ ߟߊ߫ ߞߎߡߊ ߘߐ߫
ߒ ߕߴߊ߬ ߛߐ߬ߘߐ߲߬ ߸ ߒ ߘߌ߫ ߕߏ߫ ߒ ߛߎ߯ ߟߊ߫
ߌ ߓߊ߯ ߊ߬ ߟߊߟߌ߫ ߞߊ߬ߙߊ߲ ߞߏ ߟߊ߫
ߛߴߊ߬ ߘߌ߫ ߛߋ߫ ߘߏ߯ߣߍ߲߫ ߛߓߍ߫ ߟߊ߫
ߌ ߘߴߊ߬ ߞߊ߲߬ ߡߍ߲ ߟߐ߯ߟߊߟߌ ߟߊ߫
ߒ ߘߌߣߵߊ߬ ߞߊ߬ߙߊ߲߬ ߗߐ߫ ߝߙߍ ߕߎߡߊ߫ ߟߊ߫
ߘߏ߫ ߟߎ߫ ߖߍ߬ߘߍ ߦߋ߫ ߞߏ ߛߎ߯ ߟߊ߫
ߣߴߊ߬ߟߎ߬ ߕߴߛߋ߫ ߞߏ ߡߍ߲ ߠߎ߬ ߟߊ߫
ߊ߬ߟߎ߬ ߘߌ߫ ߕߏ߫ ߸ ߏ߬ ߘߐߜߊ߬ߛߌ߬ ߟߊ߫
ߞߴߏ߬ ߟߐ߯ߓߐ߫ ߘߎߧߊ ߓߍ߯ ߟߊ߫
ߒߞߏ ߕߍ߫ ߞߍ߫ ߸ ߏ߬ ߟߎ߬ ߛߊ߬ߥߏ߫ ߘߌ߫
ߊ߲ߠߎ߬ ߦߴߊ߬ ߞߍ߫ ߸ ߊ߲ ߛߍ߬ߓߍ ߘߌ߫
ߞߊ߬ ߛߎ ߞߍ߫ ߸ ߊ߬ ߞߊ߬ߙߊ߲ ߘߌ߫
ߘߐ߬ߖߊ ߣߌ߫ ߘߙߎ߬ߞߕߐ߫ ߟߊ߫
ߌ ߞߴߌ ߓߌ߬ߟߊ߬ ߘߋ߬ ߡߐ߱ ߏ߬ ߟߎ߬ ߝߍ߬
ߌ ߘߏ߲߬ ߞߴߌ ߕߊ߬ ߘߎߢߊ߫ ߞߏ ߟߎ߫ ߝߍ߬
ߣߴߌ ߞߴߌ ߕߊ߬ ߸ ߣߕߊ߬ߓߊ ߟߎ߫ ߝߍ߬
ߌ ߘߌ߫ ߛߍ߰ ߝߎ߯ ߸ ߌ ߕߍߣߊ߬ ߘߤߊ߫ ߟߊ߫
ߊߟߊ߫ ߓߘߴߊ߬ ߞߍ߫ ߸ ߊ߬ ߟߊ߫ ߞߕߌ ߘߐ߫
ߊ߬ ߘߏ߲߬ ߓߘߴߊ߬ ߝߐ߫ ߞߎ߬ߙߊ߬ߣߊ ߘߐ߫
ߞߏ ߡߍ߲ ߓߊ߯ ߊ߬ ߖߊ߫ ߸ ߊ߬ ߟߊ߫ ߞߏ ߟߎ߬ ߘߐ߫
ߊ߬ ߘߴߏ߬ ߞߊ߲ߘߊ߫ ߸ ߊ߬ ߟߊ߫ ߛߌߟߊ ߟߊ߫
ߊߟߊ߫ ߣߍߡߊ߫ ߞߋߟߓߊ ߦߋ߫
ߞߊ߬ ߞߛߌ ߞߍ߫ ߸ ߊ߬ ߘߏ߲߬ߞߏ ߟߎ߬ ߦߋ߫
ߛߊ߬ߓߊ ߟߎ߬ ߣߌ߫ ߡߊ߲߬ߕߏ߲ ߠߎ߬ ߦߋ߫
ߞߵߊ߲ ߞߊ߲ߘߊ߫ ߟߐ߲ߠߌ߲߫ ߛߌߟߊ߫ ߟߊ߫
ߝߏߘߋ߫ ߛߟߏ߬ߡߊ߯ߣߊ߫ ߞߊ߲ߕߍ߫ ߓߟߏ߫ ߸ߒߞߏ ߛߓߍߛߎ߲ ߞߊ߲ߡߊߛߙߋߡߊ ߛߌ߲ߘߌߓߊ߮ ߡߊ߰ߙߌ ߦߋ߫ ߦߊ߬ߝߴߊ߬ ߡߊ߬ (ߊ. ߘ)
ߊ߬ ߟߊߖߍ߲ߛߍ߲ߓߊ߮ ߦߋ߫ : ߒߞߏ ߞߊߙߊ߲ߘߋ߲ ߊߓߴߘߎߟߊߦߌ ߘߎ߲߬ߓߎ߬ߦߊ ߟߋ߬ ߘߌ߫ ߞߊ߬ ߓߐ߫ ߓߡߊ߬ߞߐ߫ ߖߌߞߙߐߣߌ߲߫ ߔߊߙߊ.
