ߊ߬ߟߌߦߎ߬ ߝߊ߬ߓߘߊ߬ߟߊ߲߬ߘߌ߫ ߖߓߊ߬ߕߍ߫ ߸ ߂߀ / ߀߄߲ / ߀߁߭ ߒߞߏ ߞߊ߲ߜߍ ߟߊ߫ ߡߊ߲߬ߕߊ߬ߣߌ߲߬ߧߊߒߞߏ ߘߏ߲߬ߞߏ ߟߎ߬ ߣߌ߫ ߖߐ߫ ߸ ߏ߬ ߕߊ߬ߡߌ߬ߣߍ߲ ߞߐ߫ ߒ ߛߊ߬ߣߊ߲߬ߞߎ߲߫ ߸ ߒߠߋ ߝߊ߬ߛߏ߬ߟߊ߲߬ߘߌ߫ ߖߓߊ߬ߕߍ߫ ߟߋ߬ ߦߴߊ߬ ߝߍ߬ ߣߌ߲߬ ߞߊ߬ ߒߞߏ ߞߊ߲ߜߍ ߟߊ߫ ߡߊ߲߬ߕߊ߬ߣߌ߲߬ߦߊ ߘߏ߫ ߟߋ߬ ߟߊߛߙߋߦߴߊߟߎ߫ ߦߋ߫ ߥߟߊ߬ߟߋ߲ ߣߌ߲߬ ߘߐ߫ ߸ ߣߊߟߌ߬ߡߎ߲߫ ߞߊ߲ߜߍ ߞߎߡߊߘߋ߲߫ ߈߲ ߘߌ߫ ߸ ߏ߬ ߡߍ߲ ߦߋ߫ ߢߌ߬ߣߌ߲߬ߞߊ߬ߟߌ ߘߌ߫. ߟߐ߲ߞߏߕߌ߯ ߛߟߏ߬ߡߊ߯ߣߊ߫ ߞߊ߲߫ ߠߋ߬ ߞߏ߫ ߢߌ߬ߣߌ߲߬ߞߊ߬ߟߌ ߞߘߐ ߟߋ߬ ߢߊߦߋߟߌ ߢߌߣߌ߲ ߘߌ߫ ߸ ߊ߬ ߞߵߊ߬ ߢߣߊߡߊ ߟߎ߬ ߘߐߕߟߊ߫ ߁߁ ߢߐ߲߰ ߘߌ߫ ߸ ߞߏ߬ߣߌ߲߬ ߒߠߋ ߦߴߊ߬ ߝߍ߬ ߞߊ߬ ߒ ߓߊ߬ߘߏ߬ ߊ߬ߟߎ߬ ߈߲ ߠߋ߬ ߘߐ߫ ߸ ߦߏ߫ ߕߊ߲߬: ߞߟߐ߬ߞߟߐ߬ ߟߊ߫ ؟ ߏ߬ ߘߌߦߊ߫ ߘߊ߫ ߟߋ߬ ؟ ߏ߬ ߜߊ߬ ߘߊ߫ ߤߙߊ߫ ߟߊ߫ ؟ ߌ ߦߴߏ߬ ߟߋ ߝߐ߫ ߟߊ߫ ߘߏ߯ߣߍ߲߫ ؟
ߞߏ߬ߣߌ߲߬ ߒߠߋ ߟߊ߫ ߟߊ߬ߛߙߋ߬ߦߊ߬ߟߌ ߣߌ߲߬ ߘߐ߫ ߸ ߒߠߋ ߦߴߊ߬ ߝߐ߫ ߟߊ߫ ߟߋ߬ ߒ ߞߏ߫ ‹‹ߏ߬ ߓߊ߬ߘߏ ߘߌ߫ ߓߐ߫ ߟߋ߬ ؟››. ߏ߬ ߞߘߐ ߟߋ߬ ߞߏ߫ ߊ߬ߟߎ߬ ߕߴߏ߬ ߘߝߐ߫ ߟߊ߫ ߟߊ߫ ߟߋ߬ ߘߍ߯. ߡߋ߬ߘߋ ߘߝߐߓߊߟߌ ߟߴߏ߬ ߘߌ߫ ߕߋ߲߬ ؟ ߺ ߒߞߏ ߟߊߝߙߏ߬ߓߦߊ߬ߟߌ߫ “ߞߟߎߝߓߊ” ߟߊ߫ ߂߀߁߉ ߝߘߏ߬ߓߊ߬ ߜߙߊ߫ ߡߊߞߟߌߣߍ߲ ߞߍ߬ ߸ ߏ߬ ߡߍ߲ ߞߍ߫ ߘߊ߫ ߓߡߊ߬ߞߐ߫. ߞߊ߬ ߞߐ߲߬ ߜߊ߬ߙߊ ߢߍ߫ ߞߊߙߏ߫ ߞߋߟߋ߲߫ ߢߐ߲߰ ߸ ߞߟߋߞߟߋߡߊߦߟߍ ߟߎ߬ ߞߍ߫ ߘߊ߫ ߓߟߐߟߐ߫ ߛߌߟߊ ߟߎ߫ ߞߊ߲߬ ߸ ߞߏ߫ ߞߟߎߝߓߊ ߣߊ߬ߕߐ߫ ߜߊ߬ߙߊ߫ ߢߐ߲߰ߦߋ߬ߓߊߟߌ ߘߏ߫ ߟߋ߬ ߞߍ߫ ߟߊ߫ ߓߡߊ߬ߞߐ߫ ߸ ߡߍ߲ ߘߌ߫ ߞߍ߫ ߘߝߐ߬ߟߊ߬ߞߊ ߘߌ߫، ߒߠߋ ߓߟߐߟߐ߫ ߝߐ߬ߓߍ߬ߦߊ߬ߟߊ߫ ߝߊ߬ߓߘߊ߬ߟߊ߲߬ߘߌ߫ ߞߊ߬ߟߊ ߕߊ߬ ߏ߬ ߟߋ߬ ߘߐ߫ ߸ ߒ ߞߏ߫ ߒ ߘߌ߫ ߜߊ߬ߙߊ ߣߌ߲߬ ߟߊߡߊ߲߬ߘߌ߬ ߞߊߦߘߌ ߞߊ߲߬ ߞߣߊ߬ߕߏ߫ ߊ߬ ߟߊߖߋߙߌ߫ ߟߊ߫ ߓߟߐߓߟߐ߫ ߛߌߟߊ ߟߎ߫ ߞߊ߲߬.ߞߟߎߝߓߊ ߛߊ߫ ߛߘߊߟߊߟߌ߫ ߞߊ߲:
ߊ߬ߟߎ߬ ߡߊ߫ ߘߊ߲߬ ߓߟߐߟߐ߫ ߞߊ߲ߠߊ ߟߎ߫ ߡߊ߬ ߘߋ߬ ߸ ߊ߬ߟߎ߫ ߞߊ߬ ߛߘߊߟߊߟߌ ߞߍ߫ ߖߌ߬ߦߊ߬ߞߊ߲ ߣߌ߫ ߞߎߡߊߛߏ ߓߍ߯ ߟߋ߬ ߟߊ߫ ߸ ߛߘߊߟߊߟߌ߫ ߞߊ߲ ߏ߬ ߕߘߍ߬ ߟߋ߬ ߞߏ߫:
((ߊߟߎ߫ ߡߊ߬ߟߌ߬ߞߊ߬ ߓߡߊߣߊ߲ ߠߎ߬ ߸ ߊߟߎ߫ ߡߍ߲ ߠߎ߫ ߦߋ߫ ߓߡߊߣߊ߲߫ ߞߊ߲ߓߏߟߏ߲ ߝߐ߫ ߟߊ߫ ߸ ߒ߬ ߞߊ߲߫ ߊߟߎ߫ ߟߋ߬ ߡߊ߬ ߸ ߜߙߊ߬ߓߊ ߟߋ߬ ߡߊߞߟߌߣߴߊ߲ ߓߟߏ߫ ߞߊߙߌ߫ ߣߊߕߐ ߸ ߜߊ߬ߙߊ ߣߌ߲߬ ߞߎ߲߭ ߠߋ߬ ߓߡߊߣߊ߲߫ ߞߊ߲ ߛߓߍߟߌ ߘߌ߫ ߸ ߒ߬ ߧߴߊ߬ ߞߊ߬ߟߊߡߊ߬ ߖߐ߫ ߞߏ߫ ߒߞߏߞߏ ߢߌ߲߬ ߘߐ߫ ߊߟߎ߫ ߟߋ߬ ߕߐ߬ߢߍ߰ߣߍ߲߫ ߸ ߓߊ ߊߟߎ߫ ߟߋ߬ ߞߊ߫ ߛߌߦߊ߫ ߸ ߏ߬ ߓߍ߯ ߣߴߊ߬ ߕߊ߬ ߸ ߊߟߎ߫ ߞߘߊߡߊߣߍ߲߫ ߟߊ߬ߖߌ߬ߣߍ߫ ߞߊ߲ߞߊ߲߫ ߡߊ߬ߣߌ߲߬ߞߊ߲߬ ߡߐ߬ߙߌ߬ߣߍ߲߬ ߞߊ߲ ߠߋ߬ ߛߓߍ߫ ߟߊ߫ ߞߵߊ߬ ߝߐ߫ ߏ߬ ߡߊ߬ ߞߏ߫ “ߒߞߏ”. ߊߟߎ߫ ߟߊ߫ ߞߊ߲ ߓߘߊ߫ ߟߊߜߊ߬ߛߌ߬ ߸ ߊ߬ߟߎ ߟߋ߬ ߞߊ߲߫ ߊߟߎ߫ ߟߊ߫ ߞߊ߲߫ ߓߟߋߓߟߋߓߊ ߣߌ߲߬ ߡߊ߬ ߣߌ߲߬ ߞߏ߫: ߝߘߏ߬ߓߊ߬ߝߟߌ ߸ ߥߟߊ߫ ߝߐߞߏߖߎ߮ ߸ ߤߊߡߊ߲ߕߍ߫ ߘߊߘߓߐߢߐ߲߯ߞߐ ߣߌ߫ ߘߊߘߐߣߐ߮ ߸ ߏ߬ ߡߊ߬ ߸ ߒߠߋ ߟߐ߲ߞߏߕߌ߯ ߞߊ߲ߞߊ߲ߦߟߊ߫ ߞߊ߬ ߓߐ߫ ߓߎߞߊߙߌߟߊ߫ (ߊߡߙߌߞߌ߬) ߸ ߒ ߓߘߊ߫ ߣߊ߬ ߞߊ߬ߝߏ߬ ߒ ߡߙߌߦߊ߫ ߞߋߟߋ߲ߢߐ߲߮ ߘߏ߫ ߟߎ߫ ߡߊ߬ ߓߡߊ߬ߞߐ߫ ߦߊ߲߬ ߸
ߊ߲ ߓߘߊ߫ ߜߊ߬ߙߊ ߡߊߞߟߌ߫ ߊߟߎ߫ ߦߋ߫ ߏ߬ ߟߋ߬ ߘߐ߫ ߸ ߊߟߎ߫ ߞߙߎ ߦߋ߫ ߣߊ߬ ߓߌ߯ ߸ ߝߘߏ߬ߓߊ߬ߝߟߌ߫ ߣߌ߫ ߝߐߞߏߖߎ߮ ߣߌ߫ ߘߊߘߐߟߊߙߌ߫ ߕߴߦߋ߲߬ ߡߎ߬ߕߎ߲߬ ߸ ߊ߬ ߓߍ߯ ߟߋ߬ ߛߓߍߕߐ߫ ߛߌߣߍ߲߬ ߞߵߊ߬ ߘߊߡߌ߬ߣߊ߬ ߓߌ߬ ߟߊ߫، ߒ ߓߘߊ߫ ߞߊ߲ߡߊߛߙߋ ߖߍ߬ߘߍ ߞߎ߲߬ߠߊߞߊ߬ ߞߊ߬ ߓߊ߲߫ ߞߊ߬ ߛߓߍߘߋ߲߫ ߞߎߘߊ߫ ߢߣߊߡߊ߫ ߘߊ߲ߘߐ߫ ߛߌ߲ߘߌ߫ ߸ ߏ߬ ߟߎ߬ ߘߌߣߊ߬ ߝߙߊ߬ ߛߟߏ߬ߡߊ߯ߣߊ߫ ߟߊ߫ ߛߌ߲ߘߌߣߍ߲ ߞߊ߲߬ ߸ ߏ߬ ߓߊ߯ ߞߍ߫ ߸ ߊ߬ ߘߌ߫ ߛߋ߫ ߥߟߋ߫ ߟߊ߫ ߛߌߣߍ߲߬ߛߊ߫ ߞߏ߫ “ߒߞߏ” . ߒ߬ ߓߘߊ߫ ߞߋߟߊ ߟߐ߬ ߛߌ߲ߘߌߓߊ߮ ߡߐߦߌߝߋ߲߫ ߝߟߐ߫ ߡߊ߬ ߣߊߟߌ߬ߡߎ߲߫ ߞߏ߲߬ߓߏ߫ ߓߎߙߡߊ߫ ߞߊ߲ߕߍ߫ ߘߌ߫ ߸ ߊ߬ ߘߌ߫ ߣߊ߬ ߜߊ߬ߙߊ ߣߌ߲߬ ߢߣߊߓߊ߯ߦߊ߫ ߸ ߊ߬ ߣߌ߫ ߝߊ߬ߛߏ ߡߐ߰ߓߊ߬ ߞߟߊߒߞߋ ߛߌߦߊߡߊ߲߫ ߸ ߒߠߋ ߓߘߊ߫ ߓߊ߲߫ ߒ ߕߊ߬ ߟߊ߫ ߸ ߊ߲ ߧߴߊߟߎ߫ ߟߋ߬ ߡߊߞߐ߬ߣߐ߲ ߠߊ߬))
ߜߊ߬ߙߊ ߛߌ߲߬ߝߏ߲߬ߓߊ߯ ߡߊߟߐ߲ߣߍ߲ ߠߎ߬
ߋ߫߹ ߜߊ߬ߙߊ ߣߌ߲߬ ߟߌ߲߬ߝߏ߲ ߠߎ߫ ߞߊ߬ ߛߘߊߟߊߟߌ߫ ߘߍ߬ߜߍ ߖߍ߬ߘߍ ߟߋ߬ ߞߍ߫ ߸ ߊ߬ ߛߌ߲߬ߝߏ߲ ߠߎ߬ ߘߐ߫ ߒ ߧߋ߫ ߡߐ߰ ߛߊ߬ߓߊ߫ ߟߋ߬ ߕߐ߮ ߡߊߘߊ߲߫ ߠߴߊߟߎ߫ ߦߋ߫ ߦߊ߲߬ ߸ ߡߍ߲ ߠߎ߬ ߕߐ߮ ߓߐ߫ ߘߊ߫ ߖߊ߲߬ߖߏ߲ ߣߌ߲߬ ߘߐ߫ ߣߍ߲ߞߍ߫ ߥߟߊ߫ ߓߊߞߍ߫ ߸ ߡߐ߰ ߛߊ߬ߓߊ߫ ߏ߬ ߟߎ߫ ߟߋ߬ ߣߌ߲߬:
߁߭ ߺ ߛߟߊߕߌ߯ ߡߊ߬ߓߏ߲߬ߧߊ߬ߕߊ߫ ߥߛߊ߬ߘߋ߲߬ ߞߊ߲ߡߋߙߋ߲: ߖߊ߰ ߡߐ߰ ߘߌ߫ ߛߋ߫ ߞߍ߫ ߟߊ߫ ߕߌߢߍߟߌߟߊ ߘߌ߫ ߡߊ߬ߞߎ߲ ߣߌ߫ ߡߎ߬ߢߎ߲ ߞߘߐ߫ ߸ ߓߊߏ߬ ߞߊ߬ߙߊ߲߬ߡߐ߮ ߥߊ߬ߣߌ߲߬ߞߋ ߖߍ߬ߘߍ ߦߋ߫ ߟߐ߲߫ ߠߴߊ߬ ߟߊ߫ ߞߊ߬ߙߊ߲߬ߘߋ߲ ߠߎ߬ ߞߎߡߢߊ ߟߋ߬ ߘߐ߫ ߕߞߌ߫.
߂߲ ߺ ߊߡߙߌߞߌ߬ ߞߊ߲ߞߊ߲ߦߟߊ߫ ߞߎߘߊ: ߝߊ߬ߙߊ߲߬ߛߌ߫ ߞߢߊ߬ ߘߊ߫ ߡߍ߲ ߠߊ߫ ߗߏ߫ ߸ ߗߍ߭ ߡߍ߲߬ ߠߋ߬ ߞߵߊ߬ ߞߊ߬ߟߌ߬ ߝߘߊ߬ߜߍ ߟߎ߬ ߟߊ߫ ߖߐ߲ߓߐ߫ ߞߎߘߊ ߛߘߊ ߘߐ߫ ߸ ߞߏ߫ ߊ߬ߟߋ ߘߌߣߵߏ߬ ߞߍ߫ ߤߊߟߌ߬ ߞߣߐ߬ߣߍ߲ ߕߴߊ߬ ߜߊ߲߫ ߠߴߊ߬ ߢߊ߱ ߞߎ߲߬ߠߊ߬ ߸ ߦߏ߫ ߒ߬ ߣߊ߬ߕߐ߫ ߏ߬ ߦߋ߫ ߟߊ߫ ߘߎ߰ߟߊ ߢߊ ߡߍ߲ ߛߌߛߍ߲߬. ߊߟߊ߫ ߣߌ߫ ߘߐ߬ߝߐ ߦߋ߫ ߞߍ߫ ߒ߬ ߓߍ߯ ߡߊ߬ ߛߙߋ ߘߌ߫.
߃߲ ߺ ߜߋ߲߭ ߞߐ߰ߖߌ߬ߘߊ߫ ߞߏ߲߬ߓߏ߫ ߞߊ߲ߡߊߛߙߋߟߐ߲ߓߊߟߌ߫: ߗߍ߭ ߡߍ߲߬ ߠߊ߫ ߞߏ ߡߊߞߓߊߣߍ߲߫ ߞߟߋ߫ ߹ ߓߴߊ߬ ߡߊ߫ ߒߞߏ ߟߐ߲߫ ߸ ߞߏߕߌ߯ߦߊ ߘߌߡߴߊ߬ ߦߋ߫ ߸ ߟߊ߬ߝߛߊ߬ߟߌ߬ߟߊ ߟߋ߬ ߸ ߕߎ߬ߢߊ߬ߟߊ߲߬ߘߌ߫ ߕߍ߫. ߊ߬ߟߋ ߦߋ߫ ߖߎ߬ߟߊ߬ߘߎ߯ ߡߍ߲ ߘߐ߫ ߏ߬ ߘߌ߫ ߣߊߟߌ߬ߡߎ߲߫ ߜߋ߲߭ ߞߐ߰ߖߌߘߊ ߘߌ߫ ߸ ߒ ߓߘߊ߫ ߒ ߞߊ߬ߟߌ߬ ߘߐ߬ߛߊ߬ߙߌ߬ ߞߟߊߒߞߋ ߕߌ߱ ߟߊ߫ ߸ ߏ߬ ߡߍ߲ ߣߵߊ߬ ߟߊߖߌ߰ ߟߊ߫ ߛߎ߲ߞߊߙߏߓߊ ߘߐ߫ ߸ ߒ߬ ߦߋ߫ ߟߏ߲ ߡߍ߲ ߘߐ߫ ߦߏ߫ ߂߀߂߀ ߞߏ߲ߞߏߘߌ߬ߓߌ߫ ߸ ߤߊ߲߯ ߕߋ߲߬ ߸ ߊ߬ߟߋ ߕߍ߫ ߛߋ߫ ߟߊ߫ ߖߎ߬ߟߊ߬ ߞߊ߲ߓߏߟߏ߲ ߏ߬ ߛߓߍ߫ ߟߴߊ߬ ߢߌ߬ߡߊ ߟߊ߫، ߏ߬ ߟߋ߬ ߞߙߊ ߦߋ߫ ߒߞߏߞߏ ߘߐ߫ ߛߎ ߣߌ߫ ߕߋ߬ߟߋ ߓߍ߯ ߘߐ߫. ߝߏ߫ ߊ߬ߟߎ߬ ߓߘߴߊ߬ ߟߊߥߊ߲߬ߞߊ߫ ߊ߬ߟߎ߬ ߟߊ߫ ߞߊ߲ߕߌ߮ ߘߌ߫. ߓߴߊ߬ ߕߘߍ߬ ߓߘߊ߫ ߥߊߕߑߛߊߔ ߞߙߎ߫ ߘߏ߫ ߛߌ߲ߘߌ߫ ߂߀߁߆ ߝߊ߲߬ߝߍ߬ߟߊ ߟߎ߬ ߘߐ߫ ߞߵߏ߬ ߕߐ߮ ߟߊ߫ “ߡߊ߲߬ߘߋ߲߫” ߠߊ߫.
ߞߵߊ߬ ߕߘߍ߬ ߊ߬ߟߋ ߖߍ߬ߘߍ ߦߋ߫ ߡߊ߲߬ߘߋ߲߬ߧߊ ߞߍ߬ߟߍ ߛߍ߬ߘߏ߲ ߠߊ߫ ߛߎ ߣߌ߫ ߕߋ߬ߟߋ ߓߍ߯ ߘߐ߫ ߸ ߓߴߊ߬ ߦߴߊ߬ ߝߐ߫ ߟߊ߫ ߞߎߡߊ ߘߐ߫ ߛߐ߲߬ ߞߏ߫ ߊ߲ߠߎ߬ ߦߟߌ ߦߋ߫ ߡߊ߲߬ߘߋ߲߫ ߞߙߎߝߊ߫ ߞߏ ߡߍ߲ ߡߊ߬ ߞߴߏ߬ ߕߍ߫ ߛߥߊ߬ߓߊ߫ ߘߌ߫ ߸ ߞߏ߫ ߡߊ߲߬ߘߋ߲߫ ߓߘߊ߫ ߘߐߖߍ߲ߛߍ߲߫ ߢߊ ߡߍ߲ ߥߙߎߣߍߦߟߊ ߟߎ߬ ߓߟߏ߫ ߸ ߞߴߏ߬ ߦߋ߫ ߕߞߌߦߊ ߡߊߛߐ߬ߛߐ߬ߓߊߟߌ ߟߋ߬ ߘߌ߫ ߸ ߓߍ߯ ߟߊ߫ ߖߡߊ߬ߣߊ߫ ߓߘߊ߫ ߘߊ߲߬ߟߐ߲߫ ߸ ߖߡߊ߬ߣߊ ߏ߬ ߓߍ߯ ߘߏ߲߬ ߣߴߊ߬ ߕߊ ߝߊ߬ߛߏ߬ߦߊ ߛߓߍ ߟߋ߬. ߏ ߘߐ߫ ߒߞߏ ߞߊߙߊ߲ߘߋ߲ ߠߎ߬ ߞߊ߫ ߞߊ߲߫ ߞߵߊ߬ߟߎ߫ ߛߐ߲߬ ߏ߬ ߟߋ߬ ߡߊ߬ ߞߵߊ߬ ߘߐߟߐ߲߫. ߊ߬ ߞߊ߬ ߣߌ߲߬ ߝߐ߫ ߥߎ߬ߦߊ߲߬ߞߌ߬ߟߌ ߥߊߕߑߛߊߔ ߞߙߎ ߞߊ߲߬. ߊ߬ ߟߊ߫ ߡߊ߲߬ߘߋ߲߫ ߥߊߕߑߛߊߔ ߞߙߎ ߸ ߏ߬ ߦߋ߫ ߒߞߏ ߣߌ߫ ߛߟߏ߬ߡߣߊ߬ ߞߊ߲ߕߍ߫ ߣߌ߫ ߡߊ߲߬ߘߋ߲߬ߧߊ ߞߍ߬ߟߍ ߘߊߘߐߖߊߥߏ ߦߌߟߊ ߟߋ߬ ߘߌ߫ ߸ ߊ߬ߟߎ߬ ߕߍ߫ ߞߟߊ߬ߕߌ߮ ߝߍ߬ ߦߋ߲߬ ߸ ߝߏ߫ ߞߙߊߕߌ߮، ߏ߬ ߟߋ߬ ߞߏߛߐ߲߬ ߊ߬ ߞߊ߬ ߒߠߋ ߟߊߖߌ߰ ߊ߬ ߟߊ߫ ߞߙߎ߫ ߏ߬ ߞߊ߲߬ ߸ ߊ߬ߟߎ߫ ߖߍ߬ߘߍ ߟߋ߬ ߞߊ߬ ߒ ߠߊߦߟߍ߬ ߊ߬ߟߎ߫ ߖߍ߬ߘߍ ߡߊ߬ ߘߋ߬. ߌ ߞߵߊ߬ ߟߐ߲߫ ߒߠߋ ߞߋߟߋ߲߫ ߕߍ߫ ߞߟߊ߬ߕߌ߮ ߘߌ߫ ߦߋ߲߬ ߸ ߞߏ߬ߣߌ߲߬ ߓߊߏ߬ ߒߠߋ ߕߍ߫ ߛߋ߫ ߒ ߡߊߞߎ߲߬ ߠߊ߫ ߕߌߢߍߟߌߟߊ ߟߊ߫ ߕߌߢߍߟߌ ߡߊ߬ ߣߌ߫ ߒ ߡߊ߫ ߞߎߡߊ߫ ߸ ߒ ߠߊߖߌ߰ ߞߎ߲ ߝߟߍ߫ ߏ߬ ߘߌ߫.
ߜߊ߬ߙߊ ߘߟߊߞߊ߬ߟߌ:
ߜߊ߬ߙߊ ߘߊߦߟߍ߬ ߕߎߡߊ ߟߋ߬ ߛߋߣߍ߲߫ ߤߊ߲߯ ߞߊ߬ ߕߊ߬ߡߌ߲߬ ߸ ߡߐ߱ ߟߎ߫ ߡߊ߫ ߣߊ߬ ߦߏ߫ ߊ߬ߟߎ߬ ߞߟߌ߫ ߘߊ߫ ߢߊ ߡߍ߲ ߸ ߖߌ߬ߦߊ߬ߖߟߎ߬ߦߊ߬ߟߊ ߕߘߍ߬ ߞߍߟߊ߲ (ߊߔߙߊߦߋ) ߟߐ߬ ߟߊ߫ ߡߐ߰ ߘߊ߲ߘߐ߫ ߟߋ߬ ߞߊ߲߬ ߛߐ߲߬ ߸ ߊ߬ ߣߌ߫ ߞߊ߲߬ ߞߎ߬ߡߊ߬ߟߊ ߟߎ߫ ߖߍ߬ߘߍ. ߒߠߋ ߓߟߐߟߐ߫ ߝߐ߬ߓߍ߬ߦߊ߬ߟߊ ߞߊ߬ ߢߌ߬ߣߌ߲߬ߞߊ߬ߟߌ ߟߎ߬ ߣߌ߫ ߡߊ߬ߢߌ߬ߣߌ߲߬ߞߊ߬ߟߌ ߟߎ߬ ߘߊߡߌ߬ߘߊ߬ ߏ߬ ߟߋ߬ ߘߐ߫ ߒ ߞߏ߫ ߡߋ߬ߘߋ߫ ߞߵߊ߬ ߞߍ߫ ߓߡߊߣߊ߲ ߠߎ߬ ߡߊ߫ ߕߊ߯ ߜߙߊ߬ߓߊ ߣߌ߲߬ ߘߐ߫؟؟؟
ߊ߬ߟߎ߬ ߟߊ߫ ߞߊ߬ߙߊ߲߬ߘߋ߲ ߘߏ߫ ߟߎ߫ ߞߊ߲߫ ߒ ߧߋ߫ ߞߏ߫ ߜߊ߬ߙߊ ߣߌ߫ ߛߊ߲ߖߌ ߣߊ߭ ߟߋ߬ ߓߍ߲߬ ߘߊ߫ ߸ ߓߊߡߊ߬ߣߊ ߘߏ߲߬ ߡߊ߫ ߘߋ߬ߙߌ߬ ߛߊ߲ߖߌ߫ ߞߘߐ߫ ߜߙߊ߫ ߟߊ߫، ߍ߲߬ߍ߲ߍ߲߬ ߘߋ߬ ߸ ߘߏ߫ ߟߎ߫ ߞߊ߲߫ ߞߏ߫ ߛߊ߲ߖߌ ߣߐ߬ ߕߍ߫ ߘߋ߬ ߸ ߞߏ߫ ߛߊ߲ߝߢߐ ߟߋ߬ ߞߵߊ߬ ߞߍ߫، ߘߏ߫ ߟߎ߫ ߝߣߊ߫ ߞߊ߲߫ ߞߴߏ߬ ߛߌ߫ ߕߍ߫ ߸ ߞߏ߫ ߛߊ߲ߜߊߟߌߡߊ ߢߍߛߌߟߊ߲ߢߍ ߟߋ߬ ߞߊ߬ ߓߊߡߊ߬ߣߊ ߞߢߊ߬ ߓߐ߫ ߟߊ߫. ߒߠߋ ߣߊ߬ ߒ ߕߟߏ ߓߐ߫ ߟߊ߫ ߞߊ߬ߙߊ߲߬ߘߋ߲߬ ߞߎߡߊ ߏ߬ ߟߎ߬ ߞߘߐ߫ ߞߊ߬ ߒ ߥߟߍߡߊߟߐ߬ ߓߟߐߟߐ ߞߊ߲߬ ߊ߬ߟߎ߬ ߟߊ߫ ߞߊ߲ߕߌ߯ߓߊ ߖߍ߬ߘߍ ߟߊ߫ ߸ ߖߎ߬ߟߊ߬ ߗߍ߬ߓߊ ߞߊ߲߫ ߞߏ߫ ߜߊ߬ߙߊ ߣߌ߲߬ ߝߟߐ ߟߋ߬ ߕߘߍ߬ ߦߴߌߘߐ߫ ߕߋ߲߬ ߸ ߞߏ߫ ߡߐ߱ ߟߎ߫ ߘߏ߲߬ ߞߟߊߓߎ ߡߊ߲߫ ߘߌ߫ ߞߏ߫ ߛߌ߫ ߛߋ߲߬ߢߊ߬ ߝߟߐ ߘߐ߫.
ߞߎߡߊ ߏ߬ ߡߊ߫ ߒߠߋ ߓߟߐߟߐ߫ ߝߐߓߍߦߟߊ ߞߎ߲߭ ߡߌ߬ߘߊ߬ ߝߋߎ߫ ߸ ߓߊߏ߬ ߤߙߊ߫ ߡߊߞߏ ߟߎ߫ ߛߋ߲߬ߢߊ߬ ߝߟߐ ߖߍ߬ߘߍ ߟߋ߬ ߖߌ߲ߘߊ߲ ߘߌ߫ ߸ ߦߏ߫: ߗߍ߬ ߜߊߣߊ߲ ߠߊ߫ ߡߛߏ߬ ߝߟߐ߬ ߞߏ، ߝߌ߬ߟߓߊ߬ ߞߎߘߊ ߟߎ߬ ߟߊ߫ ߘߋ߲߫ ߝߟߐ߫ ߞߏ߫، ߞߎߡߊߕߍ߫ ߡߌ߬ߙߌ߲߬ߘߌ߬ ߞߊ߲߫ ߛߓߍߓߊߟߌ ߟߊ߫ ߛߓߍߟߌ߫ ߞߎߘߊ߫ ߞߏ߫ ߡߊ߬.
ߓߊ߲߬ߓߋ߬ߦߊ߬ߟߊ ߟߎ߬:
ߊ ߺ ߞߊ߲ߞߊ߲ߦߟߊ ߞߵߊ߬ ߟߊ߫ ߛߓߍߘߋ߲߫ ߞߎߘߊ߫ ߃ ߦߌ߬ߘߊߞߊ߬ ߓߊ߲ߓߙߊ ߟߎ߬ ߟߊ߫ ߸ ߓߊߏ߬ ߛߓߍߘߋ߲߫ ߞߎߘߊ߫ ߃ ߏ߬ ߟߎ߫ ߟߋ߬ ߛߘߊ ߘߐ߫ ߓߡߊߣߊ߲߫ ߞߊ߲ ߘߌ߫ ߛߋ߫ ߛߓߍ߫ ߟߊ߫ ߹
ߋ ߺ ߖߏ ߘߌ߫ ߘߊ߫ ߊߟߑߝߊߓߋ ߝߏߣߓߌߞ ߍ߲ߕߍߙߑߣߊߛߌߦߐ߲ߣߊߟ ߡߊ߬ ߏ߬ ߟߊ߫ ߘߛߍ ߞߐ߫ ߸ ߞߴߏ߬ ߟߋ߬ ߘߌ߫ ߛߋ߫ ߊߝߙߌߞߌ߬ ߞߊ߲ ߠߎ߬ ߛߓߍ߫ ߟߊ߫ ߝߊߙߊ߲ߝߊ߯ߛߌ߫ ߘߝߊߣߍ߲ ߘߐ߫.
ߌ ߺ ߝߏߘߋ߫ ߛߟߏ߬ߡߣߊ߬ ߞߊ߲ߕߍ߫ ߘߊ߲ߕߌߢߍߟߌ: ߞߏ߫ ߒߞߏ ߛߓߍߛߎ߲ ߕߍ߫ ߛߋ߫ ߝߘߊ߬ߝߌ߲߬ߠߊ߫ ߞߊ߲ ߠߎ߬ ߓߍ߯ ߛߓߍ߫ ߟߴߊ߬ ߢߊ ߡߊ߬ ߸ ߝߏ߫ ߣߌ߫ ߊߡߙߌߞߌ߬ ߟߐ߲ߞߏߕߌ߯ ߞߎߘߊ߫ ߞߊ߲ߞߊ߲ߦߟߊ ߟߊ߫ ߛߓߍߘߋ߲߫ ߞߎߘߊ߫ ߛߌ߲ߘߌߣߍ߲߫ ߃ ߝߙߊ߬ ߘߴߊ߬ ߞߊ߲߬ ߘߋ߬. ߝߣߊ߫ ߛߟߏ߬ߡߊ߯ߣߊ߫ ߞߵߊ߬ ߝߐ߫ ߞߏ߫ ߒߞߏ ߞߊ߲ߡߊߛߙߋ ߦߋ߫ ߄ ߘߌ߫ ߸ ߞߵߊ߬ ߕߘߍ߬ ߜߎ ߊ߬ߟߋ ߓߘߴߊ߬ ߕߌߙߌ߲߫ ߞߵߊ߬ ߦߋ߫ ߃ ߟߋ߬، ߏ߬ ߘߐ߫ ߒߞߏ ߞߊ߲ߡߊߛߙߋ ߦߋ߫ ߃ ߟߋ߬ ߘߌ߫.
ߺ ߟߐ߲ߞߏߕߌ߯ ߞߎߘߊ ߞߊ߲߫ ߕߎ߲߯ ߞߏ߫ ߊ߬ ߝߐ ߡߍ߲ ߞߍߣߍ߲ ߞߊ߲ߜߍ ߘߐ߫ ߛߟߏ߬ߡߣߊ߫ ߓߟߏ߫ ߞߏ߫ ߘߊߘߐߓߐ߬ߦߐ߲߬ߞߐ߬ߣߍ߲ ߣߌ߫ ߘߊߘߐߟߊߙߌ ߣߌ߫ ߘߊߘߐߞߎߙߊ߲ ߸ ߞߵߏ߬ ߦߋ߫ ߣߊ߬ߣߌ߲߬ߠߌ ߣߌ߫ ߖߓߍߟߌ ߣߌ߫ ߓߏ߲߬ߧߊ߬ߓߊߟߌߦߊ ߟߋ߬ ߘߌ߫ ߞߊߕߙߍ߬ ߞߊ߲ߓߏߟߏ߲ ߕߐ߭ ߟߎ߫ ߡߊ߬ ߸ ߊ߬ ߜߋ߲ߜߋ߲߫ ߸ ߓߡߊߣߊ߲߫ ߞߊ߲ߝߐߟߊ ߟߎ߬.
ߺ ߊ߬ ߞߊ߲߫ ߞߏ߫ ߛߟߏ߬ߡߣߊ߫ ߞߊ߬ ߕߌߙߌ߲ ߡߍ߲ ߞߍ߫ ߞߊ߬ ߒߞߏ ߞߎߡߊߘߋ߲ ߠߎ߫ ߞߎ߲߬ߠߊߞߊ߬ ߁߀ ߘߌ߫ ߸ ߞߴߏ߬ ߕߍ߫ ߛߥߊ߬ߓߊ߫ ߘߌ߫. ߞߵߊ߬ߟߋ ߓߘߴߊ߬ ߕߌߙߌ߲߫ ߞߎߘߊ߫ ߘߌ߫ ߸ ߞߏ߫ ߉ ߟߋ߬. ߊ߬ ߣߌ߫… ߊ߬ ߦߋ߫ ߣߌ߲߬ ߠߎ߬ ߝߐ߫ ߟߊ߫ ߕߎ߬ߡߊ ߡߍ߲ ߏ߬ ߞߵߊ߬ ߕߘߍ߬ ߝߘߊ߬ߜߍ ߟߎ߬ ߓߊ߲ߛߊ߲ ߦߋ߫ ߖߐ߲ߓߐ߲߫ ߞߎߘߊ߫ ߘߌ߫ ߟߴߊ߬ ߡߊ߬ ߓߎߞߊߙߌߟߊ߫ (ߊߡߙߌߞߌ߬ ߞߊ߬ߣߌ߲߬). ߊ߬ ߦߴߊ߬ ߥߊߛߏ߫ ߟߴߊ߬ ߟߊ߫ ߖߐ߲ߓߐ߲߫ ߞߎߘߊ ߏ߬ ߟߊ߫.
ߺ ߊ߬ ߘߍ߬ߒߞߏ߬ߡߊ߬ߢߐ߲߮ ߘߏ߫ ߟߎ߫ ߕߊ߯ ߘߴߊ߬ ߝߍ߬ ߸ ߏ߬ ߟߎ߫ ߞߵߊ߬ ߦߌ߬ߘߊ ߟߋ߬ ߞߏ߫ ߤߊߟߌ߬ ߛߟߏ߬ߡߣߊ߬ ߞߊ߲ߕߍ߫ ߡߊ߫ ߞߊ߲ߜߍ ߟߊߘߊ߲߫، ߊ߬ ߘߏ߲߬ ߡߊ߫ ߞߊ߲ߞߎ߬ߙߎ߲߬ߘߎ ߝߣߊ߫ ߟߊߘߊ߲߫. ߟߐ߲ߞߏߕߌ߯ ߞߎߘߊ ߘߏ߲߬ ߓߘߴߊ߬ ߦߌ߬ߘߊ߬ ߞߏ߫ ߛߟߏ߬ߡߊ߯ߣߊ߫ ߟߊ߫ ߛߓߍߛߎ߲߫ ߛߌ߲ߘߌߣߍ߲ ߡߊ߫ ߘߝߊ߫ ߸ ߊ߬ ߣߌ߫ ߞߏ߫ ߛߟߏ߬ߡߊ߯ߣߊ߫ ߞߵߊ߬ ߝߐ߫ ߞߏ߫ ߞߊ߲ߡߊߛߙߋ ߦߋ߫ ߣߊ߯ߣߌ߲ ߘߌ߫ ߸ ߞߵߊ߬ ߕߘߍ߬ ߜߎ ߏ߬ ߝߣߊ߫ ߕߍ߫ ߣߊ߯ߣߌ߲ ߘߌ߫.
ߊ߯ ߹ ߕߐ߲߫ ߞߎߘߊ ߣߌ߲߬ ߠߊ߫ ߢߍߥߟߊ ߡߊߞߓߊߣߍ߲߫ ߘߋ߬. ߞߎߡߊ ߢߌ߲߬ ߠߎ߫ ߞߏ߬ߣߌ߲߬ ߡߊ߫ ߓߙߊ߬ ߒߠߋ ߝߊ߬ߛߏ߬ߟߊ߲߬ߘߌ߫ ߖߓߊ߬ߕߍ߫ ߘߐ߫ ߸ ߓߊ ߘߏ߫ ߞߵߊ߬ ߝߐ߫ ߒߠߋ ߦߋ߫ ߓߡߊ߬ߞߐ߫ ߂߀߁߇ ߕߙߊߓߊ ߟߊ߫ ߸ ߞߏ߫ ߛߟߏ߬ߡߣߊ߬ ߞߊ߲ߕߍ߫ ߡߊ߫ ߒߞߏ ߛߓߍߛߎ߲ ߛߌ߲ߘߌ߫ ߸ ߒ ߞߊ߲߫ ߊ߬ ߡߊ߬ ߒ ߞߏ߫ ߋ߯߹ ߒ߬ߓߊ߬ ߖߍߣߍ߲߫ ߠߋ߬ ߞߵߊ߬ ߛߌ߲ߘߌ߫ ߏ߬ ߘߐ߫ ؟ ߺ ߊ߬ ߞߊ߲߫ ߞߏ߫ ߓߌ߲ߕߎ߫ ߓߞߊߙߌ߫ ߞߊ߬ߓߊ߫ ߟߋ߬ ߞߵߊ߬ ߛߌ߲ߘߌ߫ (ߊ.ߘ). ߊ߬ ߞߍ߫ ߘߊ߫ ߒ ߣߊߘߋ߲߫ ߞߘߐ߫ ߡߛߏ ߢߣߊ߫.
ߊ߲ ߘߌ߫ ߥߟߊ߬ߟߋ߲߬ ߝߟߐ ߣߌ߲߬ ߟߊߟߐ߬ ߦߊ߲߬ ߡߎߣߎ߲߬ ߝߟߐ߫ ߸ ߞߊ߬ ߕߐ߬ߝߍ߬ߦߊ߬ߟߌ ߓߌ߬ߟߊ߬ ߞߊ߬ ߥߟߊ߬ߟߋ߲߲߬ ߝߌߟߊߣߊ߲ ߡߊߞߐ߬ߣߐ߲߬. ߒ ߧߋ߫ ߘߎߓߊ߫ ߟߊ߫ ߸ ߊߟߊ߫ ߒ߬ ߕߊ߲߬ߞߊ߬ “ߛߊߓߎߖߎ߯ ߡߊ߬ߡߊ߬ߟߌ߫ ߖߊ߲߬ߞߊߙߏ” (ߛ.ߡ.ߖ) ߕߙߐ ߡߊ߬.
ߝߊ߬ߛߏ߬ߟߊ߲߬ߘߌ߫ ߊ߬ߟߌ߬ߦߎ߬ ߖߓߊ߬ߕߍ߫ ߓߟߏ߫ ߸ ߣߎߥߊߞߌߛߐߕ ߡߙߎߕߊߣߌ߫ ߖߘߍ߬ߞߟߏ߬ ߞߊ߲ߓߍ߲ ߞߎߓߋߛߏ.
